हुम्ला — हुम्लालाई राष्ट्रिय सडक सञ्जालमा जोड्ने गरी बजेट विनियोजन गरेको घोषणा गर्न पाँच वर्षयताका सबै सरकारले छुटाएका छैनन् । बजेट पनि विनियोजन नभएको होइन । हुम्लालाई सडक सञ्जालमा जोड्न सरकारले २०७१ देखि कर्णाली करिडोर निर्माण सुरु गरेको हो । तर काम सुस्त हुँदा हुम्ला सदरमुकाम सिमकोटमा अहिलेसम्म सडक पुगेको छैन ।
सडक सुविधा नहुँदा हुम्लामा हवाई यातायातको विकल्प छैन । अहिलेको सरकारले पनि एक वर्षभित्र हुम्लामा सडक पुर्याउने घोषणा गरेको छ । तर कठिन भूगोल, अपर्याप्त बजेट अभाव, समयमै काम नहुनुलगायत कारणले ढिलाइ भइरहेको छ । अब १० किलोमिटर सडक बन्दा हुम्ला सदरमुकाम सिमकोट राष्ट्रिय सडक सञ्जालमा जोडिन्छ ।
सिमकोटदेखि सरिसल्ला खण्डको लालीखोला भीरदेखि स्यालतडीसम्मको क्षेत्रमा सडकको ट्र्याक खोल्नै बाँकी छ । १० किमिमध्ये ७ किमिमा चट्टान फुटाउन सरकारले एक महिनाअघि नेपाली सेनालाई जिम्मा दिने निर्णय गरिसकेको छ । बाँकी ३ किलोमिटरमा भने निर्माण व्यवसायीमार्फत काम हुनेछ । कर्णाली करिडोरअन्तर्गतको कालीकोटको खुलालुदेखि सिमकोटसम्मको १ सय ७३ किमिमध्ये १ सय ६३ किमि ट्र्याक खुलिसकेको हिल्सा–सिमकोट सडक आयोजनाका प्रमुख इन्जिनियर बिसुनदास लामाले बताए ।
खुलालुदेखि सरिसल्लासम्मको १ सय २३ किमिको निर्माण नेपाली सेनाले गरेको हो । बाँकी ४० किमिमा सडक डिभिजन कार्यालयमार्फत ट्र्याक खोलिएको थियो । अहिलेसम्म कर्णाली करिडोर निर्माणमा १ अर्ब ५ करोड ७७ लाख रुपैयाँ खर्च भइसकेको आयोजना कार्यालयले जनाएको छ ।
यो करिडोरमा भारी हिमपातका कारण मंसिरदेखि चैतसम्म काम गर्न समस्या छ । ठाउँ ठाउँमा भेटिने कडा चट्टानका कारण पनि सडक निर्माणमा समस्या भएको प्रमुख इन्जिनियर लामाले बताए । ‘मेसिनले चट्टान फुटाउन सकिँदैन, विस्फोटक पदार्थ ल्याउन पनि प्रक्रिया झन्झटिलो हुँदा काम बर्सेनि प्रभावित भइरहेको छ,’ उनले भने । बाँकी खण्डमा निर्माणको काम अघि बढाउन सेना र आयोजना कार्यालयले संयुक्त अनुगमन गरिरहेको उनले जानकारी दिए ।
कोरोना महामारीका कारण चीनले २०७६ मंसिरदेखि हिल्सा नाका बन्द गरेपछि निर्माण सामग्री ढुवानीमा पनि समस्या भएको सडक आयोजना कार्यालयले जनाएको छ । चीनबाट निर्माण सामग्री नआउँदा करिडोरअन्तर्गतका ४ वटा पुल निर्माणको काम ठप्प छ । चीनतर्फको हिल्साबाट सिमकोटसम्म ९५ किमि सडकखण्डमा ट्र्याक खोलिसकिएको छ । तर च्याछारा भीरको ग्रेड मिलाउन अझै बाँकी रहेको लामाले बताए ।
सरकारले भारतको रुपैडियादेखि चीनको हिल्सालाई सडक सञ्जालले जोड्न कर्णाली करिडोरको अवधारणा अघि सारेको हो । यसको निर्माण पूरा भए कर्णालीको विकासले फड्को मार्ने नागरिक अगुवा पदम लामाले बताए । ‘कर्णालीको समग्र विकासका लागि पनि यो करिडोरको आवश्यकता छ,’ उनले भने, ‘तर ७० सालयताका सबै सरकारले एक वर्षभित्रै हुम्लामा गाडी पुर्याउने घोषणा गरे पनि पुग्दो बजेट कहिल्यै आएन ।’
अनलाइन नागरिक २२ कार्तिक २०७८, सोमबार ०९:०४